ᠬᠢᠲᠠᠳ ᠤ᠋ᠨ ᠺᠣᠯᠣᠨᠢᠴᠢᠯᠠᠯ ᠥᠪᠦᠷ ᠮᠣᠩᠭᠤᠯ ᠳ᠋ᠤ᠌
1. ᠬᠢᠲᠠᠳ ᠥᠪᠦᠷ ᠮᠣᠩᠭᠤᠯ ᠢ᠋ ᠡᠵᠡᠯᠡᠬᠦ ᠡᠴᠡ ᠡᠮᠦᠨᠡ᠂ ᠮᠣᠩᠭᠤᠯ ᠣᠷᠤᠨ ᠤ᠋ ᠪᠠᠢᠭᠠᠯᠢ ᠳᠡᠯᠡᠬᠡᠢ ᠣᠩᠭᠤᠨ ᠲᠠᠷᠬᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠤᠸᠠ ᠦᠵᠡᠰᠭᠦᠯᠡᠩ ᠲᠡᠢ ᠪᠠᠢᠵᠤ᠂ ᠬᠥᠮᠦᠨ ᠠᠷᠠᠳ ᠨᠢ ᠠᠭᠤᠤ ᠶᠡᠬᠡ ᠨᠡᠭᠦᠳᠡᠯ ᠰᠣᠶᠤᠯ ᠤ᠋ᠨ ᠠᠮᠠ ᠪᠠᠷ ᠤᠯᠠᠮᠵᠢᠯᠠᠳᠠᠭ ᠰᠤᠷᠭᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠥᠰᠴᠦ ᠬᠥᠮᠦᠵᠢᠵᠦ᠂ ᠨᠤᠲᠤᠭ ᠤᠰᠤᠨ ᠤ᠋ ᠤᠬᠠᠭᠠᠨ ᠲᠠᠢ ᠴᠢᠳᠠᠪᠤᠷᠢ ᠲᠠᠢ ᠪᠠᠶᠠᠳ ᠨᠣᠶᠠᠳ ᠨᠢ ᠦᠨᠳᠦᠰᠦ ᠤᠭᠰᠠᠭᠠ ᠪᠠᠨ ᠳᠠᠭᠠᠭᠤᠯᠤᠨ ᠠᠮᠢᠳᠤᠷᠠᠭᠰᠠᠨ ᠡᠶᠡ ᠨᠠᠢᠷᠲᠠᠢ ᠬᠡᠪ ᠦ᠋ᠨ ᠰᠠᠢᠬᠠᠨ ᠨᠡᠢᠭᠡᠮ ᠦ᠋ᠨ ᠪᠦᠲᠦᠴᠡ ᠲᠡᠢ ᠪᠠᠢᠪᠠ᠃ ᠬᠢᠲᠠᠳ ᠤ᠋ᠨ ᠺᠣᠮᠮᠤᠨᠢᠰᠲ ᠨᠠᠮ ᠣᠷᠤᠵᠤ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠂ ᠭᠠᠵᠢᠭ ᠪᠤᠷᠤᠭᠤ ᠪᠦᠬᠦ ᠵᠦᠢᠯ ᠢ᠋ ᠠᠪᠴᠢᠷᠠᠨ᠂ ᠦᠨᠳᠦᠰᠦᠲᠡᠨ ᠦ᠌ ᠦᠨᠡᠲᠦ ᠵᠦᠢᠯ ᠦ᠋ᠳ ᠢ᠋ ᠤᠰᠠᠳᠭᠠᠬᠤ ᠪᠠᠷ ᠣᠷᠤᠯᠳᠤᠵᠤ ᠡᠳᠦᠢ ᠬᠦᠷᠪᠡ᠃ 1935 ᠣᠨ ᠳ᠋ᠤ᠌ ᠮᠠᠣ ᠽᠧ ᠳ᠋ᠦᠩ᠂ ᠢᠷᠡᠭᠡᠳᠦᠢ ᠳ᠋ᠦ᠍ ᠡᠪ ᠬᠠᠮᠲᠤ ᠨᠠᠮ ᠤᠯᠤᠰ ᠪᠠᠢᠭᠤᠯᠬᠤ ᠳ᠋ᠤ᠌ ᠬᠦᠷᠪᠡᠯ᠂ ᠥᠪᠦᠷ ᠮᠣᠩᠭᠤᠯ ᠲᠤᠰᠠᠭᠠᠷ ᠤᠯᠤᠰ ᠪᠣᠯᠬᠤ ᠪᠠᠨ ᠥᠪᠡᠷ ᠦ᠋ᠨ ᠬᠦᠰᠡᠯ ᠢ᠋ᠶ᠋ᠡᠷ ᠰᠣᠩᠭᠤᠵᠤ ᠪᠣᠯᠤᠨᠠ ᠬᠡᠮᠡᠨ ᠵᠠᠷᠯᠠᠵᠤ ᠪᠠᠢᠪᠠ᠃
2. ᠬᠢᠲᠠᠳ ᠤ᠋ᠨ ᠡᠪ ᠬᠠᠮᠲᠤ ᠨᠠᠮ ᠥᠪᠦᠷ ᠮᠣᠩᠭᠤᠯ ᠢ᠋ ᠡᠵᠡᠯᠡᠭᠰᠡᠨ 74 ᠵᠢᠯ ᠤ᠋ᠨ ᠲᠤᠷᠰᠢ᠂ ᠠᠩᠬᠠᠨ ᠠ᠋ᠴᠠ ᠪᠠᠨ ᠪᠡᠯᠡᠳᠭᠡᠵᠦ ᠲᠥᠯᠦᠪᠯᠡᠭᠰᠡᠨ ᠶᠣᠰᠤᠭᠠᠷ᠂ ᠠᠯᠬᠤᠮ ᠲᠠᠷᠠᠭᠠ ᠲᠠᠢ ᠪᠠᠷ᠂ ᠮᠣᠩᠭᠤᠯ ᠬᠥᠮᠦᠨ ᠦ᠌ ᠰᠤᠷ ᠰᠣᠳᠤᠴᠤᠤᠯ ᠢ᠋ ᠬᠢᠳᠤᠨ ᠬᠢᠷᠭᠠᠵᠤ᠂ ᠮᠣᠩᠭᠤᠯ ᠬᠥᠮᠦᠨ ᠦ᠌ ᠡᠷᠬᠡ ᠮᠡᠳᠡᠯ ᠡᠷᠬᠡ ᠴᠢᠯᠦᠭᠡ ᠶ᠋ᠢ ᠪᠤᠯᠢᠶᠠᠨ ᠠᠪᠴᠤ᠂ ᠭᠠᠵᠠᠷ ᠳᠡᠭᠡᠷᠡᠬᠢ ᠭᠠᠵᠠᠷ ᠳᠣᠣᠷᠠᠬᠢ ᠪᠦᠬᠦ ᠪᠠᠶᠠᠯᠢᠭ ᠢ᠋ ᠴᠥᠯᠪᠡᠨ ᠰᠣᠷᠤᠵᠤ᠂ ᠦᠭᠡ ᠬᠡᠯᠡ ᠦᠰᠦᠭ ᠪᠢᠴᠢᠭ ᠢ ᠨᠢ ᠰᠣᠶᠤᠯ ᠲᠡᠦᠬᠡ ᠶ᠋ᠢ ᠨᠢ ᠠᠷᠴᠢᠵᠤ ᠤᠰᠠᠳᠭᠠᠨ᠂ ᠬᠣᠷᠢᠵᠤ ᠬᠠᠰᠢᠨ᠂ ᠳᠠᠷᠤᠯᠠᠯ ᠳᠣᠷᠤᠮᠵᠢᠯᠠᠯ ᠢ᠋ ᠲᠤᠯᠲᠠᠯᠠ ᠶᠠᠪᠤᠭᠤᠯᠵᠠᠢ᠃
3. ᠣᠢᠷᠠᠬᠠᠨ ᠪᠣᠯᠤᠭᠰᠠᠨ ᠨᠢᠭᠡᠨ ᠲᠣᠳᠤ ᠵᠢᠱᠢᠶᠡ ᠭᠡᠪᠡᠯ᠄ ᠬᠢᠲᠠᠳ ᠤ᠋ᠨ ᠵᠠᠰᠠᠭ ᠥᠪᠡᠷ ᠦ᠋ᠨ ᠦᠨᠳᠦᠰᠦᠨ ᠬᠠᠤᠯᠢ ᠠ᠋ᠴᠠ ᠪᠠᠨ ᠵᠥᠷᠢᠴᠡᠵᠦ᠂ 2020 ᠣᠨ ᠠ᠋ᠴᠠ ᠡᠬᠢᠯᠡᠨ ᠮᠣᠩᠭᠤᠯ ᠬᠥᠮᠦᠨ ᠦ᠌ ᠥᠪᠡᠷ ᠦ᠋ᠨ ᠡᠬᠡ ᠬᠡᠯᠡ ᠦᠰᠦᠭ ᠪᠢᠴᠢᠭ ᠢ᠋ᠶ᠋ᠠᠨ ᠰᠤᠷᠴᠤ ᠡᠵᠡᠮᠰᠢᠬᠦ ᠡᠷᠬᠡ ᠶ᠋ᠢ ᠬᠢᠵᠠᠭᠠᠷᠯᠠᠨ᠂ ᠡᠰᠡᠷᠭᠦᠴᠡᠭᠰᠡᠨ ᠬᠥᠮᠦᠰ ᠢ᠋ ᠬᠡᠳᠦᠨ ᠮᠢᠩᠭᠠ ᠪᠠᠷ ᠱᠣᠷᠤᠩ ᠳ᠋ᠤ᠌ ᠬᠢᠵᠦ᠂ ᠶᠢᠰᠦᠨ ᠥᠪᠦᠷ ᠮᠣᠩᠭᠤᠯ ᠬᠥᠮᠦᠨ ᠡᠬᠡ ᠬᠡᠯᠡᠨ ᠦ᠌ ᠪᠡᠨ ᠲᠥᠯᠦᠭᠡ ᠠᠮᠢ ᠨᠠᠰᠤ ᠪᠠᠨ ᠠᠯᠳᠠᠵᠤ᠂ ᠣᠳᠤ ᠮᠣᠩᠭᠤᠯ ᠬᠡᠦᠬᠡᠳ ᠦ᠋ᠳ ᠲᠦ᠍ ᠠᠯᠪᠠᠳᠠᠯᠭᠠ ᠪᠠᠷ ᠬᠢᠲᠠᠳ ᠬᠡᠯᠡ ᠪᠡᠷ ᠰᠤᠷᠭᠠᠨ ᠬᠥᠮᠦᠵᠢᠯ ᠬᠦᠷᠲᠡᠭᠡᠨ᠂ ᠦᠨᠳᠦᠰᠦᠲᠡᠨ ᠢ᠋ ᠤᠰᠠᠳᠭᠠᠬᠤ ᠲᠥᠷᠦ ᠶ᠋ᠢᠨ ᠪᠣᠳᠤᠯᠭᠠ ᠶᠠᠪᠤᠭᠤᠯᠵᠤ᠂ ᠬᠥᠮᠦᠨ ᠲᠥᠷᠦᠯᠬᠢᠲᠡᠨ ᠦ᠌ ᠡᠰᠡᠷᠭᠦ ᠭᠡᠮᠲᠦ ᠬᠡᠷᠡᠭ ᠦᠢᠯᠡᠳᠴᠦ ᠪᠣᠢ᠃
4. ᠬᠢᠲᠠᠳ ᠪᠠ ᠣᠯᠠᠨ ᠤᠯᠤᠰ ᠤ᠋ᠨ ᠬᠠᠷᠢᠴᠠᠭᠠ᠃
ᠬᠢᠲᠠᠳ ᠤ᠋ᠨ ᠵᠠᠰᠠᠭ ᠳᠣᠲᠤᠭᠠᠳᠤ ᠳ᠋ᠠᠭᠠᠨ ᠠᠷᠠᠳ ᠲᠦᠮᠡᠨ ᠢ᠋ᠶ᠋ᠡᠨ ᠲᠠᠢᠰᠠᠨ ᠢ᠋ᠶ᠋ᠠᠷ ᠦᠵᠡᠨ᠂ ᠬᠢᠨᠠᠨ ᠮᠥᠷᠳᠡᠵᠦ᠂ ᠪᠣᠰᠤᠭᠰᠠᠨ ᠡᠰᠡᠷᠭᠦᠴᠡᠯ ᠢ᠋ ᠨᠢ ᠨᠤᠬᠤᠴᠢᠨ ᠳᠠᠷᠤᠵᠤ᠂ ᠦᠨᠳᠦᠰᠦᠲᠡᠨ ᠦ᠌ ᠴᠥᠭᠡᠩᠬᠢ ᠶ᠋ᠢᠨ ᠪᠦᠬᠦ ᠪᠠᠶᠠᠯᠢᠭ ᠢ᠋ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠵᠦ ᠦᠨᠳᠦᠰᠦ ᠤᠭᠰᠠᠭᠠ ᠪᠠᠷ ᠨᠢ ᠬᠠᠢᠯᠠᠭᠤᠯᠤᠨ ᠤᠰᠠᠳᠭᠠᠵᠤ᠂ ᠬᠡᠷᠡᠭᠵᠢᠭᠦᠯᠵᠦ ᠪᠠᠢᠭᠠ ᠪᠦᠬᠦ ᠪᠣᠳᠤᠯᠭᠠ ᠨᠢ ᠠᠷᠠᠳᠴᠢᠯᠠᠯ ᠡᠷᠬᠡ ᠴᠢᠯᠦᠭᠡᠨ ᠦ᠌ ᠡᠰᠡᠷᠭᠦ ᠪᠠᠢᠵᠤ᠂ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠣᠷᠤᠨᠠᠳᠠᠬᠢᠨ ᠳ᠋ᠠᠬᠢ ᠲᠣᠮᠤ ᠱᠣᠷᠤᠩ ᠪᠣᠯᠵᠤ᠂ ᠭᠠᠳᠠᠭᠠᠳᠤ ᠳ᠋ᠤ᠌ ᠥᠪᠡᠷ ᠦ᠋ᠨ ᠤᠯᠤᠰ ᠲᠠᠭᠠᠨ ᠶᠠᠪᠤᠭᠤᠯᠵᠤ ᠪᠠᠢᠭᠠ ᠳᠠᠷᠤᠩᠭᠤᠢᠯᠠᠯ ᠤ᠋ᠨ ᠲᠣᠭᠲᠠᠯᠴᠠᠭᠠ ᠬᠢᠨᠠᠯᠲᠠ ᠶ᠋ᠢᠨ ᠵᠠᠭᠪᠤᠷ ᠢ᠋ᠶ᠋ᠠᠨ ᠡᠷᠴᠢᠮᠲᠡᠢ ᠲᠦᠭᠡᠭᠡᠵᠦ ᠭᠠᠵᠠᠷ ᠪᠦᠬᠦᠨ ᠳ᠋ᠦ᠍ ᠭᠠᠮᠰᠢᠭ ᠲᠠᠷᠢᠵᠤ ᠪᠠᠢᠬᠤ ᠳ᠋ᠤ᠌᠂ ᠳᠡᠯᠡᠬᠡᠢ ᠨᠡᠢᠲᠡ ᠬᠡᠳᠦᠨ ᠠᠷᠪᠠᠨ ᠵᠢᠯ ᠬᠢᠲᠠᠳ ᠤ᠋ᠨ ᠡᠳ᠋ ᠤ᠋ᠨ ᠵᠠᠰᠠᠭ ᠲᠤ᠌ ᠬᠠᠮᠠᠷ ᠠ᠋ᠴᠠ ᠪᠠᠨ ᠳᠥᠷᠦᠯᠡᠭᠦᠯᠵᠦ᠂ ᠡᠨᠡ ᠪᠦᠬᠦᠨ ᠢ᠋ ᠠᠩᠬᠠᠷᠤᠯ ᠳ᠋ᠠᠭᠠᠨ ᠠᠪᠴᠤ ᠠᠷᠭᠠ ᠬᠡᠮᠵᠢᠶᠡ ᠠᠪᠤᠭᠰᠠᠨ ᠢ᠋ᠶ᠋ᠠᠷ ᠰᠤᠯᠠ᠂ ᠠᠰᠢᠭ ᠲᠠᠢ ᠴᠠᠭ ᠲᠣᠬᠢᠶᠠᠯ ᠢ᠋ ᠠᠯᠳᠠᠭᠰᠠᠨ ᠲᠠᠯᠠ ᠲᠠᠢ ᠪᠣᠯᠪᠠᠴᠤ᠂ ᠣᠢᠷᠠ ᠶ᠋ᠢᠨ ᠬᠡᠳᠦᠨ ᠵᠢᠯ᠂ ᠳᠡᠯᠡᠬᠡᠢ ᠪᠠ ᠬᠢᠲᠠᠳ ᠤ᠋ᠨ ᠵᠥᠪ ᠪᠤᠷᠤᠭᠤ ᠶ᠋ᠢᠨ ᠲᠡᠮᠡᠴᠡᠯ ᠦᠬᠦᠭᠰᠡᠨ ᠨᠠᠭᠤᠷ ᠰᠢᠭ᠋ < ᠲᠤᠨᠤᠮᠠᠯ ᠨᠠᠭᠤᠷ ᠰᠢᠭ᠋ > ᠪᠠᠢᠭᠰᠠᠨ ᠠ᠋ᠴᠠ ᠪᠠᠨ ᠳᠠᠯᠠᠢ ᠶ᠋ᠢᠨ ᠳᠠᠪᠠᠯᠭᠠᠨ ᠰᠢᠭ᠋ ᠬᠦᠴᠦᠲᠡᠢ ᠪᠣᠯᠵᠤ ᠬᠤᠪᠢᠷᠠᠨ᠂ ᠮᠠᠨ ᠤ᠋ ᠪᠥᠮᠪᠦᠷᠴᠡᠭ ᠲᠦ᠍ ᠴᠣ᠋ ᠰᠢᠨᠡ ᠴᠠᠭ ᠦᠶᠡ ᠬᠦᠷᠴᠦ ᠢᠷᠡᠬᠦ ᠡᠷᠡᠮᠡᠯᠵᠡᠯᠡᠯ ᠦ᠋ᠨ ᠭᠡᠭᠡ ᠬᠠᠷᠠᠭᠳᠠᠵᠤ ᠡᠬᠢᠯᠡᠭᠰᠡᠨ ᠪᠠᠢᠨᠠ᠃
ᠳᠡᠯᠡᠬᠡᠢ ᠶ᠋ᠢᠨ ᠲᠢᠭᠯᠢᠮ ᠤ᠋ᠨ ᠳᠦᠷᠢᠮ ᠭᠣᠷᠢᠮ ᠢ᠋ ᠥᠭᠡᠷᠡᠴᠢᠯᠡᠬᠦ ᠪᠡᠷ ᠣᠷᠤᠯᠳᠤᠭᠰᠠᠨ ᠬᠢᠲᠠᠳ ᠤ᠋ᠨ ᠠᠯᠢ ᠣᠯᠠᠨ ᠪᠣᠳᠤᠯᠭᠠ ᠬᠥᠳᠡᠯᠪᠦᠷᠢ᠂ ᠦᠢᠯᠡ ᠠᠵᠢᠯᠯᠠᠭᠠ ᠠ᠋ᠴᠠ ᠪᠣᠯᠵᠤ ᠠᠮᠧᠷᠢᠺᠠ ᠶ᠋ᠢᠨ ᠬᠣᠶᠠᠷ ᠨᠠᠮ ᠬᠢᠲᠠᠳ ᠤ᠋ᠨ ᠡᠰᠡᠷᠭᠦ ᠪᠣᠳᠤᠯᠭᠠ ᠳᠡᠭᠡᠷᠡ ᠳᠡᠭᠡᠳᠦ ᠬᠡᠮᠵᠢᠶᠡ ᠪᠡᠷ ᠨᠢᠭᠡᠳᠴᠦ᠂ ᠴᠢᠩᠭᠠ ᠬᠠᠲᠠᠭᠤ ᠪᠣᠳᠤᠯᠭᠠ ᠠᠪᠴᠤ ᠡᠬᠢᠯᠡᠭᠰᠡᠨ ᠪᠥᠭᠡᠳ᠂ ᠠᠮᠧᠷᠢᠺᠠ ᠶ᠋ᠢᠨ ᠵᠠᠰᠠᠭ ᠤ᠋ᠨ ᠡᠨᠡ ᠬᠠᠨᠳᠤᠰᠢ ᠡᠷᠭᠢᠰᠢ ᠦᠭᠡᠢ ᠪᠣᠯᠤᠭᠰᠠᠨ ᠨᠢ ᠲᠣᠳᠤᠷᠬᠠᠢ᠃
ᠣᠷᠤᠰ ᠤ᠋ᠨ ᠲᠤᠰᠠᠭᠠᠷ ᠲᠣᠭᠲᠠᠨᠢᠭᠰᠠᠨ ᠪᠦᠷᠢᠨ ᠡᠷᠬᠡᠲᠦ ᠦᠺᠷᠠᠢᠨ ᠤᠯᠤᠰ ᠤ᠋ᠨ ᠡᠰᠡᠷᠭᠦ ᠬᠢᠭᠰᠡᠨ ᠲᠦᠷᠢᠮᠡᠭᠡᠢ ᠲᠠᠢᠨ ᠨᠢ᠂ ᠠᠮᠧᠷᠢᠺᠠ ᠪᠠ ᠧᠦ᠋ᠷᠤᠫᠠ ᠶ᠋ᠢᠨ ᠬᠠᠷᠢᠴᠠᠭᠠ ᠶ᠋ᠢ ᠮᠠᠰᠢ ᠥᠨᠳᠦᠷ ᠲᠦᠪᠰᠢᠨ ᠳ᠋ᠦ᠍ ᠬᠦᠷᠲᠡᠯᠡ ᠨᠢᠭᠲᠠᠷᠠᠭᠤᠯᠵᠤ᠂ ᠲᠠᠢᠸᠠᠨ᠂ ᠡᠮᠦᠨᠡ ᠳᠠᠯᠠᠢ ᠵᠡᠭᠦᠨ ᠳᠠᠯᠠᠢ ᠳᠡᠭᠡᠷᠡᠬᠢ ᠲᠦᠷᠳᠡᠭᠦᠯᠥᠯ ᠨᠢ᠂ ᠠᠮᠧᠷᠢᠺᠠ ᠶ᠋ᠢᠨ ᠠᠽᠢᠶᠠ ᠨᠣᠮᠤᠬᠠᠨ ᠳᠠᠯᠠᠢ ᠶ᠋ᠢᠨ ᠬᠣᠯᠪᠤᠭᠳᠠᠭᠰᠠᠨ ᠤᠯᠤᠰ ᠯᠤᠭᠠ ᠶ᠋ᠢᠨ ᠬᠠᠷᠢᠴᠠᠭᠠ ᠪᠠ ᠲᠤᠰ ᠪᠦᠰᠡ ᠨᠤᠲᠤᠭ ᠳᠣᠲᠤᠷᠠᠬᠢ ᠤᠯᠤᠰ ᠤᠯᠤᠰ ᠤ᠋ᠨ ᠬᠣᠭᠤᠷᠤᠨᠳᠤᠬᠢ ᠬᠠᠷᠢᠴᠠᠭᠠ ᠶ᠋ᠢ ᠣᠭᠵᠤᠮ ᠰᠠᠢᠵᠢᠷᠠᠭᠤᠯᠵᠤ᠂ ᠳᠡᠯᠡᠬᠡᠢ ᠶ᠋ᠢᠨ ᠠᠷᠠᠳᠴᠢᠯᠠᠭᠰᠠᠨ ᠡᠷᠬᠡ ᠴᠢᠯᠦᠭᠡᠲᠦ ᠤᠯᠤᠰ ᠤ᠋ᠳ ᠬᠢᠲᠠᠳ ᠤ᠋ᠨ ᠡᠰᠡᠷᠭᠦ ᠮᠠᠰᠢ ᠪᠣᠭᠤᠨᠢ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠨᠢᠭᠡᠳᠴᠦ ᠴᠢᠳᠠᠵᠠᠢ᠃
5. ᠪᠦᠬᠦ ᠳᠡᠯᠡᠬᠡᠢ ᠶ᠋ᠢᠨ ᠠᠷᠠᠳ ᠲᠦᠮᠡᠨ ᠦ᠌ ᠡᠪ ᠨᠢᠭᠡᠳᠦᠯ ᠲᠡᠢ ᠲᠡᠮᠡᠴᠡᠯ ᠢ᠋ᠶ᠋ᠡᠷ ᠳᠠᠮᠵᠢᠨ᠂ ᠮᠠᠨ ᠤ᠋ ᠭᠠᠷᠠᠭ ᠲᠤ᠌ ᠳᠠᠷᠤᠩᠭᠤᠢᠯᠠᠭᠴᠢ ᠦᠭᠡᠢ᠂ ᠺᠣᠮᠮᠤᠨᠢᠰᠲ ᠦᠭᠡᠢ᠂ ᠦᠨᠳᠦᠰᠦᠲᠡᠨ ᠪᠦᠬᠦᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠥᠪᠡᠷᠲᠡᠭᠡᠨ ᠰᠢᠢᠳᠦᠭᠰᠡᠨ ᠰᠢᠨᠡ ᠴᠠᠭ ᠦᠶᠡ ᠬᠦᠷᠴᠦ ᠢᠷᠡᠬᠦ ᠨᠢ ᠴᠠᠭ ᠬᠤᠭᠤᠴᠠᠭᠠᠨ ᠤ᠋ ᠠᠰᠠᠭᠤᠳᠠᠯ᠃ ᠭᠡᠬᠦ ᠳ᠋ᠡᠭᠡᠨ ᠡᠨᠡ ᠴᠠᠭ ᠬᠤᠭᠤᠴᠠᠭᠠᠨ ᠤ᠋ ᠬᠣᠯᠠ ᠣᠢᠷᠠ ᠨᠢ ᠥᠪᠦᠷ ᠮᠣᠩᠭᠤᠯ ᠮᠡᠲᠦ ᠶ᠋ᠢᠨ ᠦᠨᠳᠦᠰᠦᠲᠡᠨ ᠦ᠌ ᠴᠥᠭᠡᠩᠭᠢ ᠳ᠋ᠦ᠍ ᠠᠪᠴᠤ ᠬᠡᠯᠡᠪᠡᠯ᠂ ᠮᠥᠬᠦᠵᠦ ᠮᠠᠨᠳᠤᠬᠤ ᠲᠠᠢ ᠬᠣᠯᠪᠤᠭᠳᠠᠬᠤ ᠬᠣᠶᠠᠷ ᠠᠳᠠᠯᠢ ᠪᠤᠰᠤ ᠦᠷᠡ ᠳᠦᠩ ᠢ᠋ ᠠᠪᠴᠢᠷᠠᠬᠤ ᠪᠣᠯᠤᠨᠠ᠃ ᠰᠢᠨᠡ ᠴᠠᠭ ᠬᠦᠷᠴᠦ ᠢᠷᠡᠬᠦ ᠨᠢ ᠣᠢᠷᠠᠬᠠᠨ ᠪᠠᠢᠪᠠᠯ᠂ ᠦᠷᠡ ᠬᠡᠦᠬᠡᠳ ᠦ᠋ᠨ ᠬᠡᠯᠡ ᠨᠢ ᠪᠦᠷᠢᠨ ᠬᠢᠲᠠᠳᠵᠢᠵᠤ ᠲᠠᠷᠢᠬᠢ ᠨᠢ ᠪᠦᠷᠢᠨ ᠣᠬᠢᠶᠠᠭᠳᠠᠵᠤ᠂ ᠰᠡᠳᠭᠢᠬᠦᠢ ᠨᠢ ᠪᠦᠷᠢᠨ ᠭᠠᠵᠢᠭᠷᠠᠬᠤ ᠠ᠋ᠴᠠ ᠡᠮᠦᠨᠡ᠂ ᠶᠡᠬᠡ ᠬᠤᠪᠢᠷᠠᠯᠲᠠ ᠲᠠᠢ ᠵᠣᠯᠭᠠᠵᠤ᠂ ᠦᠨᠳᠦᠰᠦᠲᠡᠨ ᠦ᠌ ᠣᠨᠴᠠᠯᠢᠭ ᠰᠢᠨᠵᠢ᠂ ᠰᠣᠶᠤᠯ ᠢᠷᠭᠡᠨᠰᠢᠯ᠂ ᠦᠵᠡᠯ ᠤᠬᠠᠮᠰᠠᠷ ᠨᠢ ᠠᠷᠢᠯᠬᠤ ᠠ᠋ᠴᠠ ᠡᠮᠦᠨᠡ᠂ ᠵᠢᠩᠬᠢᠨᠢ ᠮᠣᠩᠭᠤᠯ ᠬᠥᠮᠦᠨ ᠦ᠌ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠢ᠋ ᠠᠪᠴᠢᠷᠠᠵᠤ ᠴᠢᠳᠠᠬᠤ ᠪᠣᠯᠤᠨᠠ᠃ ᠬᠡᠷᠪᠡ ᠲᠡᠷᠡ ᠴᠠᠭ ᠦᠶᠡ ᠬᠦᠷᠴᠦ ᠢᠷᠡᠬᠦ ᠳᠡᠩᠳᠡᠭᠦᠦ ᠬᠤᠯᠠ ᠪᠠᠢᠪᠠᠯ᠂ ᠦᠨᠳᠦᠰᠦᠲᠡᠨ ᠦ᠌ ᠴᠥᠭᠡᠩᠬᠢ ᠨᠦ᠍ᠭᠦᠳ ᠥᠪᠡᠷ ᠦ᠋ᠨ ᠦᠨᠳᠦᠰᠦᠲᠡᠨ ᠦ᠌ ᠣᠨᠴᠠᠯᠢᠭ ᠰᠢᠨᠵᠢ ᠢ᠋ᠶ᠋ᠠᠨ ᠠᠯᠳᠠᠵᠤ᠂ ᠨᠡᠷᠡ ᠨᠢ ᠦᠨᠳᠦᠰᠦᠲᠡᠨ ᠦ᠌ ᠴᠥᠭᠡᠩᠬᠢ ᠨᠢᠳᠡᠷ ᠨᠢ ᠬᠢᠲᠠᠳ ᠬᠥᠮᠦᠰ ᠪᠣᠯᠴᠢᠬᠠᠭᠰᠠᠨ ᠪᠠᠢᠪᠠᠯ᠂ ᠡᠷᠬᠡ ᠴᠢᠯᠦᠭᠡ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠤ᠋ᠨ ᠦᠨᠡ ᠴᠠᠨᠠ ᠡᠤᠳᠭᠠ ᠪᠠᠨ ᠠᠯᠳᠠᠬᠤ ᠪᠣᠯᠤᠨᠠ᠃
ᠡᠢᠮᠦ ᠶ᠋ᠢᠨ ᠲᠤᠯᠠ ᠪᠢᠳᠡ ᠪᠦᠬᠦᠨ ᠡᠨᠡ ᠬᠦ᠌ ᠪᠣᠳᠠᠲᠤ ᠪᠠᠢᠳᠠᠯ ᠢ᠋ ᠳᠡᠯᠡᠬᠡᠢ ᠨᠡᠢᠲᠡ ᠳ᠋ᠦ᠍ ᠵᠥᠪ ᠢ᠋ᠶ᠋ᠡᠷ ᠣᠢᠯᠠᠭᠤᠯᠵᠤ᠂ ᠬᠢᠲᠠᠳ ᠤ᠋ᠨ ᠲᠠᠯᠠ ᠬᠠᠭᠠᠰ ᠠ᠋ᠴᠠ ᠢᠯᠡᠭᠦᠦ ᠨᠤᠲᠤᠭ ᠳᠡᠪᠢᠰᠭᠡᠷ ᠢ᠋ ᠡᠵᠡᠯᠡᠵᠦ ᠠᠮᠢᠳᠤᠷᠠᠳᠠᠭ ᠦᠨᠳᠦᠰᠦᠲᠡᠨ ᠦ᠌ ᠴᠥᠭᠡᠩᠬᠢ | ᠣᠯᠠᠨ ᠰᠠᠢᠬᠠᠨ ᠦᠨᠳᠦᠰᠦᠲᠡᠨ ᠨᠦ᠍ᠭᠦᠳ ᠰᠣᠶᠤᠯ ᠪᠢᠴᠢᠭ ᠳᠠᠢ ᠪᠠᠨ ᠮᠥᠬᠦᠬᠦ ᠭᠡᠵᠦ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠬᠤ ᠬᠡᠷᠡᠭᠲᠡᠢ᠃
ᠨᠢᠭᠡ ᠦᠨᠳᠦᠰᠦᠲᠡᠨ ᠦ᠌ ᠡᠷᠬᠡ ᠴᠢᠯᠦᠭᠡ᠂ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠤ᠋ᠨ ᠵᠠᠮᠨᠠᠯ ᠨᠢ ᠡᠴᠦᠰ ᠦ᠋ᠨ ᠡᠴᠦᠰ ᠲᠦ᠍ ᠠᠷᠠᠳ ᠢᠷᠭᠡᠳ ᠦ᠋ᠨ ᠬᠢᠨᠢ ᠦᠵᠡᠯ ᠤᠬᠠᠮᠰᠠᠷ ᠤ᠋ᠨ ᠬᠢᠷᠢ ᠲᠦᠪᠰᠢᠨ ᠡᠴᠡ ᠰᠢᠯᠲᠠᠭᠠᠯᠠᠨᠠ᠃ ᠡᠢᠮᠦ ᠶ᠋ᠢᠨ ᠲᠤᠯᠠ ᠬᠢᠲᠠᠳ ᠤ᠋ᠨ ᠬᠢᠯᠢ ᠳᠣᠲᠤᠷᠠ ᠪᠠᠢᠭᠠ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠵᠥᠪ ᠦᠨᠡᠨ ᠮᠡᠳᠡᠭᠡᠯᠡᠯ ᠬᠠᠩᠭᠠᠬᠤ ᠶᠠᠭᠤ ᠶᠠᠭᠤᠨ ᠠ᠋ᠴᠠ ᠴᠢᠬᠤᠯᠠ᠃
ᠬᠢᠲᠠᠳ ᠤ᠋ᠨ ᠲᠥᠷᠦ ᠵᠠᠳᠠᠷᠠᠬᠤ ᠠ᠋ᠴᠠ ᠡᠮᠦᠨᠡ ᠂ ᠮᠡᠳᠡᠭᠡᠯᠡᠯ ᠦ᠋ᠨ ᠬᠠᠭᠠᠯᠲᠠ ᠠ᠋ᠴᠠ ᠪᠣᠯᠵᠤ᠂ ᠣᠯᠠᠨ ᠲᠣᠭᠠᠨ ᠤ᠋ ᠠᠷᠠᠳ ᠢᠷᠭᠡᠳ ᠬᠢᠲᠠᠳ ᠤ᠋ᠨ ᠳᠣᠲᠤᠭᠠᠳᠤ ᠤᠬᠠᠭᠤᠯᠭᠠ ᠶ᠋ᠢᠨ ᠬᠤᠳᠠᠯ ᠮᠡᠳᠡᠭᠡᠯᠡᠯ ᠳ᠋ᠦ᠍ ᠠᠪᠲᠠᠵᠤ᠂ ᠬᠢᠲᠠᠳ ᠤᠯᠤᠰ ᠦᠨᠡᠨᠬᠦ ᠬᠥᠭᠵᠢᠵᠦ ᠬᠦᠴᠦᠷᠬᠡᠭᠵᠢᠭᠰᠡᠨ᠂ ᠬᠢᠲᠠᠳ ᠤ᠋ᠨ ᠣᠨᠴᠠᠯᠢᠭᠲᠤ ᠬᠥᠭᠵᠢᠯ ᠢ᠋ ᠳᠡᠯᠡᠬᠡᠢ ᠨᠡᠢᠲᠡ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠵᠦ ᠪᠠᠢᠭᠠ ᠂ ᠲᠡᠢᠮᠦ ᠮᠥᠷᠲᠡᠭᠡᠨ ᠬᠢᠲᠠᠳ ᠨᠢ ᠳᠡᠯᠡᠬᠡᠢ ᠶ᠋ᠢᠨ ᠬᠥᠭᠵᠢᠯ ᠳ᠋ᠦ᠍ ᠵᠠᠮ ᠵᠢᠭᠠᠵᠤ ᠥᠭᠴᠦ ᠪᠠᠢᠭᠠ ᠬᠡᠮᠡᠨ ᠡᠨᠳᠡᠭᠦᠦ ᠣᠢᠯᠭᠠᠭᠠᠳ᠂ ᠥᠪᠡᠷ ᠦ᠋ᠨ ᠦᠨᠳᠦᠰᠦᠲᠡᠨ ᠢ᠋ᠶ᠋ᠡᠨ ᠵᠢᠵᠢᠭ᠌᠂ ᠪᠠᠭᠤᠷᠠᠢ᠂ ᠬᠣᠴᠤᠷᠤᠩᠭᠤᠢ ᠬᠡᠮᠡᠨ ᠦᠨᠡᠯᠡᠵᠦ᠂ ᠦᠨᠳᠦᠰᠦᠲᠡᠨ ᠦ᠌ ᠪᠠᠬᠠᠷᠬᠠᠯ ᠢ᠋ᠶ᠋ᠠᠨ ᠠᠯᠳᠠᠬᠤ᠂ ᠦᠨᠳᠦᠰᠦᠲᠡᠨ ᠦ᠌ ᠡᠷᠬᠢᠮ ᠨᠠᠨᠳᠢᠨ ᠥᠪᠡᠷᠮᠢᠴᠡ ᠵᠦᠢᠯ ᠢ᠋ᠶ᠋ᠡᠨ ᠭᠣᠯᠤᠬᠤ ᠮᠡᠲᠦ ᠶ᠋ᠢᠨ ᠪᠠᠢᠳᠠᠯ ᠭᠠᠷᠴᠤ᠂ ᠢᠷᠡᠭᠡᠳᠦᠢ ᠳ᠋ᠡᠭᠡᠨ ᠢᠲᠡᠭᠡᠯ ᠠᠯᠳᠠᠷᠠᠵᠤ᠂ ᠬᠢᠲᠠᠳ ᠢ᠋ ᠰᠢᠳᠦᠨ ᠪᠢᠰᠢᠷᠡᠵᠦ᠂ ᠬᠤᠪᠢ ᠵᠠᠶᠠᠭᠠ ᠲᠠᠢ ᠪᠠᠨ ᠡᠪᠯᠡᠷᠡᠨ᠂ ᠲᠡᠮᠡᠴᠡᠯ ᠦ᠋ᠨ ᠵᠣᠷᠢᠭ ᠨᠢ ᠮᠣᠬᠤᠵᠤ ᠮᠡᠳᠡᠨᠡ᠃
ᠨᠢᠭᠡ ᠬᠥᠮᠦᠨ᠂ ᠨᠢᠭᠡ ᠦᠨᠳᠦᠰᠦᠲᠡᠨ᠂ ᠢᠲᠡᠭᠡᠯ ᠪᠠ ᠮᠥᠷᠦᠭᠡᠳᠦᠯ ᠬᠣᠶᠠᠷ ᠨᠢ ᠪᠠᠢᠭᠰᠠᠨ ᠴᠠᠭ ᠲᠤ᠌ ᠬᠡᠵᠢᠶᠡ ᠴᠦ᠍ ᠭᠠᠢᠬᠠᠮᠰᠢᠭ ᠪᠦᠲᠦᠭᠡᠵᠦ ᠮᠡᠳᠡᠨᠡ᠂ ᠶᠠᠭ ᠡᠰᠡᠷᠭᠦ ᠪᠡᠷ ᠢᠲᠡᠭᠡᠯ ᠮᠥᠷᠦᠭᠡᠳᠦᠯ ᠬᠣᠶᠠᠷ ᠢ᠋ᠶ᠋ᠠᠨ ᠠᠯᠳᠠᠭᠰᠠᠨ ᠪᠠᠢᠪᠠᠯ ᠮᠥᠬᠦᠯ ᠰᠦᠢᠷᠡᠯ ᠵᠦᠭ ᠭᠣᠯᠰᠣᠨ ᠣᠷᠤᠨᠠ᠂ ᠶᠠᠭ ᠡᠢᠮᠦ ᠡᠴᠡ ᠲᠡᠮᠡᠴᠡᠯ ᠦ᠋ᠨ ᠬᠥᠳᠡᠯᠭᠡᠭᠦᠷ ᠪᠣᠯᠤᠭᠰᠠᠨ ᠢᠲᠡᠭᠡᠯ ᠪᠠ ᠮᠥᠷᠦᠭᠡᠳᠦᠯ ᠢ᠋ ᠨᠢ ᠤᠨᠲᠠᠷᠠᠭᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ᠂ ᠳᠡᠯᠡᠬᠡᠢ ᠶ᠋ᠢᠨ ᠦᠨᠡᠨ ᠵᠥᠪ ᠮᠡᠳᠡᠭᠡᠯᠡᠯ ᠢ᠋ᠶ᠋ᠡᠷ ᠠᠮᠢᠯᠠᠭᠤᠯᠤᠨ ᠴᠣᠭᠰᠢᠭᠤᠯᠵᠤ ᠪᠠᠢᠬᠤ ᠬᠡᠷᠡᠭᠲᠡᠢ᠃
ᠪᠠᠭᠴᠠᠯᠠᠪᠠᠯ᠄ ᠬᠡᠷᠬᠢᠨ ᠬᠢᠲᠠᠳ ᠤ᠋ᠨ ᠢᠨᠲ᠋ᠧᠷᠨᠧᠲ ᠦ᠋ᠨ ᠴᠠᠭᠠᠨ ᠬᠡᠷᠡᠮ ᠢ᠋ ᠲᠠᠪᠠᠨ᠂ ᠠᠷᠠᠳ ᠢᠷᠭᠡᠳ ᠲᠦ᠍ ᠦᠨᠡᠨ ᠵᠥᠪ ᠮᠡᠳᠡᠭᠡᠯᠡᠯ ᠢ᠋ ᠪᠠᠢᠩᠭᠤ ᠬᠦᠷᠭᠡᠨᠡ ᠭᠡᠳᠡᠭ ᠢ᠋ ᠮᠠᠨᠤᠰ ᠲᠤ᠌ ᠠᠪᠴᠤ ᠬᠡᠯᠡᠪᠡᠯ ᠲᠤᠢᠯ ᠤ᠋ᠨ ᠴᠢᠬᠤᠯᠠ ᠰᠣᠷᠢᠯᠲᠠ ᠪᠣᠯᠵᠤ ᠪᠠᠢᠭᠠ᠃
《 ᠬᠡᠨ ᠨᠢ ᠬᠡᠨ ᠪᠤᠢ 》 
ᠬᠢᠲᠠᠳ ᠤ᠋ᠨ ᠺᠣᠯᠣᠨᠢᠴᠢᠯᠠᠯ ᠥᠪᠦᠷ ᠮᠣᠩᠭᠤᠯ ᠤ᠋ᠨ ᠪᠠᠢᠭᠠᠯᠢ ᠣᠷᠴᠢᠨ ᠢ᠋ ᠲᠠᠯᠬᠢᠭᠳᠠᠭᠰᠠᠨ ᠨᠢ